- पूर्णप्रसाद न्याैपाने / रविन श्रेष्ठ

ओखलढुंगा- ओखलढुंगाको खिजीदेम्बा गाउँपालिकाले एम्बुलेन्स खरिद गरेपनि सेवा दिन सुरु गरेको छैन । विभिन्न कारण देखाउँदै पालिकाले एम्बुलेन्स खरिद गरेको दुई महिना पुग्न लाग्दा समेत सेवा सुरु नगरेको हो ।
गत साउन २४ गते गाउँपालिका अध्यक्ष वेदबहादुर रोकाले एम्बुलेन्स बुझेका थिए । तर अहिले सम्म उक्त एम्बुलेन्सको सेवा लिन नपाएको स्थानीयले गुनासो गरेका छन् । नागरिकको सेवाका लागि गाउँपालिकाको रकमबाट खरिद गरिएको एम्बुलेन्स स्थानीयले प्रयोग गर्न नपाएको स्थानीय प्रेम श्रेष्ठले गुनासो गरे । ‘पालिकाले एम्बुलेन्स किनेको खबर सुन्दा अब हाम्रा दुखका दिन गए भन्ने लागेको थियो’ उनले भने ‘यहाँका नागरिकलाई विरामीहुँदा एम्बुलेन्स प्रयोग गर्ने सपना हात्ति आयो हात्ति आयो फुस्सा भनेझै भो ।’ श्रेष्ठका अनुसार गाउँका स्वास्थ्य चौकीमा गुणस्तरीय सेवा नभएपछि सामान्य उपचारका लागि पनि ओखलढुंगाको पश्चिमी क्षेत्रका नागरिक रामेछापको सदरमुकाम मन्थली र राजधानी धाउन बाध्य छन् ।
स्थानीयको समस्या जस्ताको त्यस्तै
गाउँपालिकाले ल्याएको एम्बुलेन्स प्रयोग गर्न नपाएका खिजीदेम्बाका नागरिकको अवस्था विगत जस्तै छ । आफन्त बिरामी हुँदा सक्नेले हेलिकप्टर चार्टर गर्छन् । नसक्नेले डोको र स्टेचरमा बोकेर उपचारका लागि नजिकैका स्वास्थ्य संस्था लैजान्छन् ।
गत शनिवार ओखलढुंगाको रगनीबाट काठमाण्डौका लागि छुटेको बसमा निकै भिड थियो । नियमित सञ्चान हुने एउटा मात्रै सवारीमा शिक्षक सेवा आयोगको परीक्षामा सहभागिहुन जाने र काम विशेषले गन्तमा जानेको भिड थियो । साल्पुबाट छुटेको बस डाँडागाउँ आईपुग्दा स्टेचरमा एउटा विरामी राखेर केही मानिस बस पर्खिएर बसेका थिए । विरामी खिजीदेम्बा १ कि कृष्णमायाँ सुनुवार थिईन् । सुरुमा त बसका चालकले विरामी राख्ने ठाउँ नभएकाले अरु विकल्प खोज्न आग्रह गरे तर विकल्प नभएको गुनासो गरेपछि विरामी बोक्न तयार भए । स्टेचरको विरामी बल्ल तल्ल बस भित्र लगियो तर राख्नेठाँउ भएन र यात्रु अघिपछि गर्ने बिचभागमै तेस्र्याइयो । डाँडागाउँबाट रामेछापको ढाँडेसम्म पु¥याउँदा विरामीको अवस्था झन जटिल बन्यो । विरामीलाई बसमा राखेर अघि बढाउन नसक्ने अवस्था आएपछि ढाँडेको एउटा मेडिकलमा उपचारका लागि भर्ना गरियो ।


रगनीकै दिर्गमायाँ श्रेष्ठलाई शुक्रबार सर्पले डस्यो । उनलाई तत्काल उपचारका लागि लैजाने परिवारले तयारी ग¥यो । तर साधन नपाएर लैजान सकेन । उनि पनि शनिवार सार्वजनिक सवारीमा चडेर उपचारका लागि मन्थली गईन् । मन्थलीमा उपचार सम्भव नभए काठमाण्डौ पुग्ने उनको योजना थियो । सर्पले डसेको लामो समय सम्म उपचार गराउन नपाउँदा बढी पिडा महसुस भएको उनले सुनाईन् ।
कृष्णमायाँ र दिर्गमायाँको समस्या प्रतिनिधि घटना मात्रै हो । खिजीदेम्बा क्षेत्रका नागरिक सामान्य उपचारबाट निको हुने रोग खपेर बस्ने गरेका छन् । रोगले बढी च्यापेपछि हतारोमा रेफर गरिएका विरामीलाई सुविधा सम्पन्न स्वास्थ्य संस्थामा पु¥याउन समस्या छ । समयमै सहजरुपमा स्वास्थ्य संस्था लैजान नसक्दा वर्षेनी खिजीदेम्बा क्षेत्रमा गर्भवती आमा र नवजात शिशुको ज्यान जाने गरेको छ ।
पोष्टमार्टम गर्न ट्रयाक्टरलाई पैंतालिस हजार
खिजीदेम्बा ३ चण्डेश्वरीकी दुतमाया परियारले केही दिन अघि आत्महत्या गरिन् । उनको शव पोष्टमार्टमका लागि रामेछापको मन्थली लैजानुपर्ने भएपछि दुतमायाँका छोरा देवीराजले गाउँपालिकाको एम्बुलेन्स मगाउन प्रयास गरे तर पाएनन् । ‘पुलिस पोष्टमार्टम नगरि हुन्न भन्छ, बोकेर लैजाने अवस्था थिएन, एम्बुलेन्स माग्दा उद्घाटन पनि भएको छैन चालक पनि छैन भनियो,’ देवीराजले भने ‘तीन दिन सम्म कुनै विकल्प नभएपछि पैँतालीस हजार दिएर मन्थलीबाट ट्रयाक्टर बोलाएँ ।’ शव मन्थली गरेर पोष्टमार्टम गरेर घर फर्कीँदा सम्म १ लाख भन्दा बढि खर्च भएको उनले सुनाए ।
गाउँपालिकाले भने एम्बुलेन्स सुरु गर्ने प्रकृया मिलाउने काम भईरहेको जनाएको छ । गाउँपालिका अध्यक्ष वेद बहादुर रोकाले यातायातमा दर्ताका लागि एम्बुलेन्स लहान पठाईएको बताए । एम्बुलेन्स सञ्चालनका लागि नितीगत निर्णय गर्नुपर्ने भएकाले एम्बुलेन्स सेवा सुरु गर्न केही समय लागेको जनाईएको छ ।
दश लाख १२ हजार ४ सय लागतमा खिजीदेम्बाले एम्बुलेन्स खरिद गरेको छ । नागरिकको सेवाका लागि एम्बुलेन्स खरिद गर्ने खिजीदेम्बा गाउँपालिका ओखलढुंगाको एक मात्र स्थानीय तह हो ।

तपाईको प्रतिक्रिया

राजकुमार मगरको ‘सुनकोशीको पुल’ बजारमा Download Listen
अागलागी र बाढी पहिराे राेकाैं Download Listen
बालविवाह नगराैं / नगराअाैं Download Listen
जनहितमा जारी सन्देश : दशै‌ंमा जुवा तास नखेलौं Download Listen
audio 3 Download Listen
audio 2 Download Listen
asudio 1 Download Listen